ചാംപ്യൻസ് ലീഗ് ഫൈനലിസ്റ്റുകളെ പോലും പിന്നിലാക്കിയ പോരാട്ടം; ഇറ്റാലിയൻ ഫുട്ബോളിന്റെ പുതിയ രാജാക്കന്മാർ

ഇറ്റാലിയൻ ഫുട്ബോളിൽ വീണ്ടും എസ് എസ് സി നാപ്പോളി രാജക്കന്മാർ. സീസണിലെ അവസാന മത്സരവും പൂർത്തിയായപ്പോൾ നിലവിലെ ചാംപ്യന്മാരായ ഇന്റർ മിലാനെ ഒരൊറ്റ പോയിന്റിന് പിന്നിലാക്കിയാണ് നാപ്പോളി വീണ്ടും സീരി എ കിരീടം സ്വന്തമാക്കിയത്. ഏറെ പ്രയാസകരമായിരുന്നു നാപ്പോളിയുടെ ഈ യാത്ര. 2023ൽ നാപ്പോളിയായിരുന്നു സീരി എ ചാംപ്യന്മാർ. എന്നാൽ കഴിഞ്ഞ വർഷം 10-ാം സ്ഥാനത്തേയ്ക്ക് താഴ്ന്നു. കഴിഞ്ഞ ഒന്നര വർഷത്തിനിടയിൽ മാറിവന്നത് അഞ്ച് പരിശീലകർ.

കഴിഞ്ഞ വർഷം ജൂണിലാണ് നാപ്പോളി പരിശീലകനായി അന്റോണിയോ കോണ്ടെ ചുമതലയേറ്റത്. 2011 മുതൽ 2014 വരെ യുവന്റസിനെ സീരി എ ചാംപ്യന്മാരാക്കിയ മാനേജർ. 2017ൽ ചെൽസിക്കൊപ്പം ഇം​ഗ്ലീഷ് പ്രീമിയർ ലീ​ഗിൽ മുത്തമിട്ടു. അന്റോണിയോ വിട്ടുപോയെങ്കിലും 2020 വരെ യുവന്റസായിരുന്നു ഇറ്റാലിയൻ ലീഗിലെ ചാംപ്യന്മാർ. ഒടുവിൽ 2021ൽ ഇന്റർ മിലാനിലെത്തി അന്റോണിയോ തന്നെ സീരി എ കിരീടം തിരിച്ചുപിടിച്ചു.

കഴിഞ്ഞ തവണ തകർന്നടിഞ്ഞ നാപ്പോളിയുടെ ചുമതല അന്റോണിയോ ഏറ്റെടുക്കുമ്പോൾ ഫുട്ബോൾ ലോകം അത്ഭുതങ്ങളൊന്നും പ്രതീക്ഷിച്ചിരുന്നില്ല. പക്ഷേ അവിടെ നിന്നും നാപ്പോളിയുടെ കഥ മാറുകയാണ്. ​ഗോൾ കീപ്പർ അലക്സ് മെററ്റ്, ക്യാപ്റ്റൻ ജിയോവാനി ഡി ലോറെൻസോ, പ്രതിരോധത്തിൽ അമീർ റഹ്മാനി, മധ്യനിരയിൽ സ്റ്റാനിസ്ലാവ് ലോബോട്ട്ക, ഫ്രാങ്ക് അംഗുയിസ എന്നിവർ സ്ഥിരമായി നാപ്പോളി ടീമിൽ ഇടം പിടിച്ചു.

ഇന്റർ മിലാനിലെ സൗഹൃദം റൊമാലു ലുക്കാക്കയെ നാപ്പോളിയിലെത്തിക്കാൻ അന്റോണിയോയ്ക്ക് സഹായമായി. എ സി റോമ വിട്ട ബെൽജിയം സ്ട്രൈക്കർ നാപ്പോളിയുടെ പടികയറി. പിന്നെ ലുക്കാക്കു 2023ലെ നാപ്പോളിയുടെ ഹീറോകളിലൊരാളായ വിക്ടര്‍ ഒസിംഹന്റെ ഒത്ത പകരക്കാരനായി. എല്ലാത്തിനുമുപരിയായി മാഞ്ചസ്റ്റർ യുണൈറ്റഡിൽ നിന്നും സ്‌കോട്ട് മക്‌ടോമിനയയെയും സ്വന്തമാക്കി. ഇത് നാപ്പോളിയെ സന്തുലിത ടീമാക്കി മാറ്റി. പിന്നെ ചാംപ്യൻസ് ലീ​ഗ് ഫൈനലിസ്റ്റുകൾ കൂടിയ ഇന്റർ മിലാനെ പോലും പിന്നിലാക്കി നാപ്പോളി ഇറ്റാലിയൻ ലീ​​ഗ് കീരിടം തിരിച്ചുപിടിച്ചു.

ഒരുകാലത്ത് ഫുട്ബോൾ ദൈവം സാക്ഷാൽ ഡീ​ഗോ മറഡോണ പന്തുതട്ടിയിരുന്ന ക്ലബ്. ചരിത്രത്തിൽ ആദ്യമായി ഇറ്റാലിയൻ സീരി എ കിരീടം നാപ്പോളി ഉയർത്തിയതും മറഡോണയുടെ കാലത്ത് തന്നെ. 1987ൽ ആദ്യമായി നാപ്പോളി ഇറ്റാലിയൻ ഫുട്ബോളിന്റെ ചാംപ്യന്മാരായി. പിന്നീടുള്ള രണ്ട് വർഷം റണ്ണേഴ്സ് അപ്പുകൾ. 1990ൽ വീണ്ടും ചാംപ്യന്മാർ. എന്നാൽ മറഡോണ യു​ഗം അവസാനിച്ചതും നാപ്പോളി വീണ്ടും തകർന്നടിഞ്ഞു.

കാത്തിരിപ്പിലായിരുന്നു നാപ്പോളി ആരാധകർ. 2023ൽ ലൂസിയാനോ സ്പല്ലെറ്റിയിലൂടെ 33 വർഷം നീണ്ട കാത്തിരിപ്പിന് അവസാനമായി. പക്ഷേ ഒറ്റ വർഷത്തിൽ നാപ്പോളി വീണ്ടും പിന്നിലേക്ക് പോയി. ഇത്തവണ വിജയത്തിലും അന്റോണിയോ മറ്റൊരു കാര്യം ഓർമിപ്പിക്കുന്നു. ചാംപ്യൻസ് ലീ​ഗ് അടുത്തുവരുന്നു. ഇറ്റാലിയൻ ലീ​ഗിലും ചാംപ്യൻസ് ലീ​ഗിലുമെല്ലാം ഒരുപോലെ പോരാടണം. വിജയങ്ങൾ നേടണം. ഇല്ലെങ്കിൽ ഇവിടം വിട്ടിറങ്ങാൻ ഞാൻ മടിക്കില്ല. അന്റോണിയോ വലിയ സിഗ്നലുകൾ നൽകുകയാണ്.

Content Highlights: Napoli Clinches Serie A Title in Dramatic Fashion